كتبت : انجل جمال
تنسيق الالوان مشكلة بتقابل تقريبا كل البنات لما بنيجي نشتري لبس مش بنعرف ازاي ننسق الالوان مع بعض وايه الالوان اللي ممكن تتلبس مع بعض وبنقع دايما في حيرة اختيار الالوان, عشان كده احنا هنسهل على كل بنات حوا المهمة دي وهنحل لهم مشكلة اختيار الالوان بدليل كامل عن الالوان وازاي تختاري الوان لبسك وتنسقيها مع بعض.
اعرفي معانا دليلك الكامل ازاي تختاري الوان لبسك وتنسقيه مع بعض:
هنعرف دلوقتي ازاي ننسق الالوان بطريقة سهلة وبسيطة جدا عن طريق عجلة الالوان ودي هتعرفنا وتسهل علينا اختيار الالوان وتنسيقها مع بعض باكتر من طريقة.
1- طريقة الالوان المتتالية على عجلة الألوان:
الطريقة الاولى في تنسيق الالوان من عجلة الالوان هي اختيار الالوان القريبة من بعض, يعني هنختار اللونين اللي جنب بعض في عجلة الالوان, هتختاري الاول اللون الرئيسي اللي انتي عايزاه واللونين اللي من ناحية اليمين ومن ناحية الشمال من اللون اللي انتي اخترتيه دول هيبقوا انسب لونين يمشوا معاه,
2- طريقة الألوان المتعاكسة على عجلة الالوان:
الطريقة التانية في اختيار الالوان بتعتمد على التضاد او الالوان اللي عكس بعض, يعني هنختار اللون بتاعنا اللي احنا عايزينه واللون اللي قصاده في عجلة الالوان ده هيكون انسب لون يمشي معاه, ويمكن في كتير يفكروا ويقولوا ازاي اللونين دول ممكن يتلبسوا مع بعض بس لما فعلا هتلبسيهم على بعض هتحسي قد ايه هما متناسقين جدا واللوك طالع حلو.
3- طريقة مثلث عجلة الالوان:
الطريقة التالتة هي طريقة مثلث الالوان, تخيلي كده شكل مثلث في نص عجلة الالوان هيبقوا التلات نقط اللي بيوصلوا المثلث هما التلات الوان اللي يمشوا مع بعض, والمثلث يبقى مع عقارب الساعة او عكس عقارب الساعة زي ما هو باين في الصورة كده ممكن المثلث يبقى لفوق على عجلة الالوان او لتحت وفي الحالتين التلات الوان اللي هيبقوا تلات نقط المثلث هي هتبقى الالوان اللي ممكن تنسقيها مع بعض.
4- طريقة الألوان المدرجة على عجلة الألوان:
الطريقة دي من اسهل الطرق وابسطها وهو اختيار درجات اللون الواحد من عجلة الالوان, والطريقة دي مناسبة للي بيحبوا اللوك الهادي البسيط.
5- طريقة الالوان المحايدة:
الالوان المحايدة اللي هي (الابيض, والاسود, والرمادي, والكحلي, والبني) ومجموعة الالوان دي بتليق على كل الالوان يعني ممكن تنسقيها على اي لون وتقريبا كلنا دولابنا مش بيخلى من الالوان دي, ممكن تلبسي الالوان المحايدة كلها مع بعض, او تلبسي لون محايد وتلبسي معاه اي لون تاني عشان تدي اللوك بتاعك حياة اكتر.
6- ازاي نلبس اللون الاسود والابيض والرمادي او الكحلي مع بعض:
لو انتي من محبات الالوان المحايدة زي الاسود والابيض والرمادي ومش حابة تغيري او تجددي, ممكن تجربي تضيفي اكسسوارات بلون فاقع عشان تدي اللوك بتاعك حياة, يعني اختاري الشنطة او الشوز او الاكسسوارات بلون مختلف يكسر نمط الالوان المحايدة.
7- ازاي تلبسي الالوان مع الهدوم المطبوع
لو هتلبسي بلوزة او قميص او جيبة او اي حاجة مطبوعة اختاري الالوان اللي تتلبس عليه يكون لون من الالوان اللي في الطبعة او الرسمة اللي عندك, يعني اي لون من الالوان اللي في الرسمة اللي في اللبس هتمشي معاه اختاري اللون اللي انتي بتحبيه اكتر ونسقيه معاه.
